HIŞYARIYA EWLEHIYÊ JI ALIYÊ ABD’Ê VE JI BO SÛRÎYÊ

Hikûmeta Dewletên Yekbûyî yên Amerîkayê (ABD) ji ber ku gerîlî û pevçûnên leşkerî li herêmê zêde bûne, ji bo Sûriyê hişyariyek nû ya ewlehiyê weşand. Di daxuyaniya ku ji aliyê Wezareta Karên Derve ya ABD’ê ve hat kirin de hate gotin ku ji 28’ê Sibatê ve rewşa ewlehiyê li welêt bi awayekî berbiçav xirabtir bûye.

Wezaretê diyar kir ku zêdebûna pevçûnên li Sûriyê ji bo welatiyên biyanî metirsiyên cidî çêdike, û bang li welatiyên Amerîkayê yên ku li welêt hene kir ku hişyar bin. Di daxuyaniyê de hat diyarkirin ku rewşa ewlehiyê dikare bi lez biguherê, ji ber vê yekê divê pêşketinên li herêmê bi baldarî werin şopandin.

Di daxuyaniyê de her weha hat bîranîn ku Balyozxaneya ABD’ê li Şamê ji sala 2012’an ve girtî ye. Ji ber vê yekê hikûmeta Amerîkayê nikare li Sûriyê ji bo welatiyên xwe xizmetên konsolosî yên asayî an jî yên acîl pêşkêş bike. Hat gotin ku berjewendiyên dîplomatîk ên ABD’ê li Sûriyê niha ji aliyê Balyozxaneya Çekyayê li Şamê ve têne temsîl kirin.

Rêveberiya ABD’ê ji welatiyên xwe yên li Sûriyê xwest ku bêyî ku li alîkariya hikûmetê bisekin, planek ji bo derketina ji welêt amade bikin. Her weha ji wan hat xwestin ku heke rewşa ewlehiyê xirabtir bibe, amade bin ku li cihê ku hene bimînin, belgeyên rêwîtiyê amade bikin û daxuyaniyên fermî bi baldarî bişopînin.

Di daxuyaniyê de her weha hate gotin ku welatiyên Amerîkayê di rewşên acîl de dikarin bi Balyozxaneya ABD’ê li Urdunê têkilî daynin. Her weha ji wan re hate pêşniyar kirin ku ji bo wergirtina hişyariyên rêwîtiyê di pergala Smart Traveler Enrollment Program (STEP) de qeyd bikin.