ÊRÎŞA POLÎSAN LI SER HALK TV’YÊ: WEŞAN HAT RAWESTANDIN, QAYYÛM HAT TAYÎNKIRIN

Di saetên sibehê yên zû de polîs êrîşî avahiya navendî ya Halk TV’yê li Stenbolê kir. Li ser kanalê qayyûm hate tayînkirin û weşana televîzyonê hate rawestandin. Hat ragihandin ku di çarçoveya lêpirsînê de biryara girtina 17 kesan hatiye dayîn û ji wan 11 kes hatine girtin.

Dema ku lêgerîna hêzên polîs ên ku di saetên sibehê de ketin avahiya Halk TV’yê didomand, rêya ku avahiya kanalê lê ye ji trafîkê re hate girtin. Nehiştin ku karmend bikevin avahiyê.

Piştî ketina polîsan ya avahiyê, pêşkêşvanê Halk TV’yê Deniz Bayramoğlu derbarê pêşketinên dawî de agahî da. Wî got ku hevdîtina Suat Toktaş, rêvebirê giştî yê weşanê yê Halk TV’yê, bi serokê heyeta qayyûmê re ji bo domandina weşanê bê encam maye. Bayramoğlu got: “Weşan hate rawestandin.”

Cafer Mahiroğlu, serokê Lijneya Rêveber a Halk TV’yê jî li ser medyaya civakî derbarê êrîşê de daxuyaniyek da. Mahiroğlu got: “Dibe ku Kılıçdaroğlu, serokê butlanê, û ekîba wî kêfxweş bin. Polîs li Halk TV’yê ye.”

BERTEKA RÊXISTINÊN ÇAPEMENIYÊ Û SENDÎKAYAN

Tayînkirina qayyûm li ser Halk TV’yê û rawestandina weşana kanalê bû sedema bertekên rêxistinên pîşeyî yên çapemeniyê û sendîkayên rojnamevanan. DİSK Basın-İş, Komeleya Rojnamevanên Hemdem (ÇGD) û Sendîkaya Rojnamevanên Tirkiyeyê (TGS), ev yek wekî destwerdaneke li azadiya çapemeniyê û derbirînê nirxandin.

DİSK Basın-İş diyar kir ku ev kiryar li dijî Halk TV’yê bûyerên sala borî yên destwerdanê li TELE1’ê tîne bîra mirovan. Sendîkayê got ku ev pêşketin xebat û pêşeroja bi sedan xebatkarên çapemeniyê jî dixe xeterê. Her wiha bang li raya giştî kir ku piştgiriyê bide azadiya çapemeniyê, mafê agahiyan bistîne û kedê rojnamevanan biparêze.

Komeleya Rojnamevanên Hemdem jî tayînkirina qayyûmê û rawestandina weşanê wekî destwerdaneke giran a li azadiya çapemeniyê û derbirînê binav kir. ÇGD diyar kir ku li Tirkiyeyê êdî tu saziya çapemeniyê xwedî garantiyên weşanê nîne û ragihand ku dê têkoşîna xwe ya ji bo çapemeniya azad û demokrasiyê bidomîne.

Sendîkaya Rojnamevanên Tirkiyeyê jî li hemberî êrîşa polîsan ya li avahiya Halk TV’yê û destwerdana li weşanê nerazîbûna xwe nîşan da. TGS ev destwerdan wekî kiryareke keyfî nirxand û got: “Em vê zordariyê qebûl nakin! Çapemenî azad e, nayê sansûrkirin!”