EREN KESKİN BANG LI LÊKOLÎNEKE LI SER BOMBEBARANKIRINA ROJNAMÊYA ÖZGÜR ÜLKE Û LÊKOLÎNA LI SER MUSTAFA SARIGÜL KIR

Endama Lijneya Rêveberiya Navendî ya Komeleya Mafên Mirovan (İHD) û yek ji parêzerên rojnameya Özgür Ülke ya wê demê, Eren Keskin, bi bîr xist ku di dema bombebarankirina rojnameyê de, di sala 1994’an de, bayi û qereqola servîsa otomobîlan a li qata jêrîn a avahiyê ya Mustafa Sarıgül bû. Keskin got ku Sarıgül tu carî ji bo vê bûyerê nehatiye lêpirsîn. Wê diyar kir ku di bombebarankirinê de xebatkarê rojnameyê Ersin Yıldız jiyana xwe ji dest da û tekez kir ku divê bûyer bi hemû aliyên xwe ve were lêkolînkirin.

Lêkolîna ku li ser îddîayên pereşûştinê û sextekariyê li dijî parlementerê Erzincanê Mustafa Sarıgül û malbata wî hatiye destpêkirin, têkiliyên Sarıgül ên di salên 1990’î de û îddîayên ku berê di rojevê de cih girtibûn, careke din xistine nîqaşê.

Eren Keskin, ku bi Ajansa Mezopotamya’yê (MA) re axivî, got ku navê Sarıgül di pêvajoya bombebarankirina rojnameya Özgür Ülke de jî derbas bûye. Keskin diyar kir ku bayi û qereqola servîsa otomobîlan a li qata jêrîn a avahiya rojnameyê ya Sarıgül bû û ev cih ji aliyê danîna bombeyê ve xalek girîng bû.

Keskin got ku navê vê karsaziyê di dosyeyan de jî cih girtiye, lê Sarıgül di wê demê de nehat xwestin ku îfade bide û nehat lêpirsîn. Wê ev yek wekî nimûneyeke bêcezabûnê nirxand û got ku ji bo ronîkirina bûyerê divê rola gengaz a Sarıgül jî were lêkolînkirin.

ÎDDÎAYA HEVKARIYA KARSENIYÊ DI NAVBÊNA MALBATÊN SARIGÜL Û AĞAR DE

Keskin diyar kir ku di salên 1990’î de kuştina karsazên Kurd û bombebarankirina rojnameya Özgür Ülke di çarçoveya operasyonên dewletê de pêk hatine. Wê bi bîr xist ku serokwezîra wê demê Tansu Çiller jî derbarê van êrîşan de daxuyaniyên dabû. Keskin got ku îddîayên derbarê têkiliyên berê yên Sarıgül bi dewleta kûr re di raya giştî de hatibûn rojevê, lê ev îddîa bi awayekî têr nehatiye lêkolînkirin.

Keskin, li gorî agahiyên ku di raya giştî de belav bûne, got ku di navbera Emir Sarıgül, kurê Mustafa Sarıgül, û Tolga Ağar, kurê Mehmet Ağar, de hevkariya karsaziyê heye. Wê diyar kir ku divê ev têkilî jî bên lêkolînkirin.

Keskin got ku ew difikire dibe ku lêkolîna nû ya li ser Sarıgül ji ber sedemên siyasî hatiye rojevê. Wê îddîa kir ku dibe ku ev mijar bi derbasbûna Sarıgül bo Partiya YENİ re têkildar be. Keskin got: “Ez difikirim ku îro Mustafa Sarıgül di nav nakokiya berjewendiyan de ye an jî ji bo ku mijara sextekariya fonan were veşartin, ji ber ku ew derbasî Partiya YENİ bûye, dixwazin zirarê bidin wî û ji ber vê yekê van mijaran dixin rojevê. Bi îhtîmaleke mezin rewş wisa ye.”

22 KES HATIN GIRTIN

Di 16’ê Cotmehê de, Serdozgeriya Giştî ya Stenbolê li dijî Mustafa Sarıgül û malbata wî, bi îddîayên “şûştina mal û milkên ku ji sûcê hatine bidestxistin” û “sextekariyê”, lêkolînek dest pê kiribû. Di çarçoveya lêkolînê de 22 kes hatin girtin. Di nav wan de kurên Sarıgül, Emir û Ömer Sarıgül, jina wî ya berê Aylin Kotil, hin karsaz û rojnamevan Murat Ağırel jî hene. Hate ragihandin ku îddîayên di dosyaya lêkolînê de hîn bi biryara dadgehê nehatine îsbatkirin.

Eren Keskin got ku di rabirdûyê de di raya giştî de têgihiştinek hebû ku Sarıgül bi dewleta kûr re têkiliyên wî hene, lê di vê mijarê de lêkolîneke têr nehatiye kirin. Wê bi bîr xist ku di dema bombebarankirina rojnameya Özgür Ülke de ew parêzerên rojnameyê bûn. Keskin got: “Dema ku rojname hate bombebarankirin, hevalê me Ersin Yıldız jiyana xwe ji dest da. Em wê demê parêzerên rojnameyê bûn. Îro ku her tişt dikeve nîqaşê, min jî xwest bûyerên rabirdûyê careke din bînim bîra mirovan.”