DÎLAN KUNT AYAN: DEWLET LI ŞÛNA PÊŞÎGIRTINA ÎSTÎSMARÊ AGAHIYAN VEDİŞÊRE

Li Mala Zarokan a Pêşwaziyê ya Yekem a Güllübağê, li navçeya Karaköprü ya Riha’yê, îdiayên îstîsmara zayendî ya li dijî zarokên di bin parastina dewletê de hatin rojevê. Parlamentera DEM Partiyê ya Riha’yê û endama Komîsyona Edaletê ya Meclîsa Mezin a Neteweyî ya Tirkiyeyê, Dîlan Kunt Ayan, diyar kir ku biryara nepenîtiyê ya di çarçoveya lêpirsînê de hatî dayîn, pêşî li agahîgirtina raya giştî digire. Wê got divê polîtîkayên pêşîlêgirtinê yên ji bo parastina zarokan werin pêkanîn.

Derbarê bûyera îstîsmara zayendî ya ku tê gotin li Mala Zarokan a Pêşwaziyê ya Yekem a Güllübağê qewimî de lêpirsîn hate destpêkirin. Li gorî agahiyên ku ji aliyê Wezareta Karûbarên Civakî ve hatine dayîn, piştî bûyerê rêveberê saziyê û şevparêz ji kar hatin dûrxistin.

“TENÊ ŞOPANDINA BÛYERÊ NE BES E”

Parlamentera DEM Partiyê ya Riha’yê, Dîlan Kunt Ayan, li ser bûyerê û hevdîtinên xwe yên bi wezaretê re nirxandin kir. Wê got ku bûyer di dawiya meha Îlonê de qewimîye û ew bi qasî du hefteyan piştî bûyerê jê haydar bûne.

Ayan bi bîr xist ku Malên Pêşwaziyê yên Yekem saziyên ku zarokên mayîna wan li cem malbatên xwe wekî metirsîdar tê dîtin, bi tedbîreke demkî dikevin bin parastina dewletê. Wê bal kişand ser rewşa pir nazik û dezavantajdar a zarokên ku di van saziyan de dimînin.

Ayan got: “Mayîna van zarokan li cem malbatên wan wekî metirsîdar hatiye dîtin û bi tedbîreke demkî ji bo mayîna wan di bin parastina dewletê de ew anîne wir. Ev cih ji aliyê şertan ve yek ji herî dezavantajdar cihan e û ji ber demkîbûna wê, zemînek pir nazik e. Lê em dibînin ku heta li cihê wiha jî bûyereke îstîsmarê tê gotin ku qewimîye.”

Ayan diyar kir ku gotina wezaretê ya “Em ê bûyerê bişopînin” ne bes e. Wê bîr xist ku berê jî mijarên îstîsmara zarokan û zewicandina zarokên biçûk di derbarê Weqfa Ensar û Weqfa Hiranurê de hatibûn rojevê.

Ayan got ku qewimîna bûyerên wiha li saziyên ku berpirsiyariya lênêrîna zarokan digirin qebûl nabe. Wê tekez kir ku tenê piştî bûyerê destpêkirina lêpirsînê ne bes e û divê ji bo parastina zarokan berî ku bûyerên wiha qewimin tedbîr bên girtin.

“BIRYARA NEPENÎTIYÊ JI BO VEDARTINA AGAHIYAN TÊ BIKARANÎN”

Ayan diyar kir ku di lêpirsîna derbarê îdiayên îstîsmara zayendî de biryara nepenîtiyê hatiye dayîn. Wê got ku di warê hiqûqê de biryarên wiha dikarin ji bo parastina delîlan û meşandina lêpirsînekê ya bi awayekî saxlem bên dayîn. Lê wê rexne li bikaranîna van biryaran kir û got ku ew ji bo veşartina agahiyan ji raya giştî û kêmkirina bertekên wê tên bikaranîn.

Ayan got ku heta niha jî nayê zanîn ka li dijî kesên ku di vê dozê de bi kirinên wan tê îdiakirin biryara girtinê hatiye dayîn an na. Wê destnîşan kir ku biryara nepenîtiyê ji armanca xwe ya bingehîn hatiye dûrxistin.

Ayan tekez kir ku nepenîtiyê divê rê li ber windakirina delîlan bigire, ne ku ji bo kêmkirina bertekên raya giştî, veşartina berpirsiyariyan an jî astengkirina eşkerekirina kêmasiyên polîtîkayên pêşîlêgirtina îstîsmara zarokan were bikaranîn.

“EM Ê JI BO KU BÛYERÊN WIHA DUBARE NEQEWIMIN BIXEBITIN”

Dîlan Kunt Ayan diyar kir ku ew ê bûyerê bişopînin û tenê bi şopandina pêvajoyê ve bisekinin na. Wê got ew ê ji bo eşkerekirina bûyerê û agahdarkirina raya giştî bixebitin.

Ayan destnîşan kir ku bi piştgiriya raya giştî dê têkoşîna wan ji bo pêşîlêgirtina bûyerên wiha mezintir bibe. Wê rexne li dewletê kir ku polîtîkayên pêşîlêgirtinê bi awayekî têrker pêk nayîne û got ku DEM Partî dê bi hevkariya raya giştî ji bo pêkanîna polîtîkayên parastina zarokan berdewam bike.