LI CIVÎNA GIŞTÎ YA KNK’YÊ TEKÎLÎYA NETEWEYÎ Û KONFERANSA NETEWEYÎ HATE DESTNÎŞANKIRIN

Roja duyemîn a Civîna Giştî ya 24’emîn a Kongreya Neteweyî ya Kurdistanê (KNK) bi gotûbêja bi sernavê “Konferansa Neteweyî” dest pê kir. Delegan li ser pêşxistina yekîtiya neteweyî û amadekariyên konferansa neteweyî nêrîn û pêşniyarên xwe anîn ziman.

Piştî daxuyaniya destpêkê ya divanê, beşdaran li ser pêşxistina hevkariyê di nav hêzên siyasî yên Kurd de axivîn.

ZUBEYIR AYDAR: DIXWAZIN LOZANEKE DUYEMÎN LI SER KURDAN FERZ BIKIN

Endamê Encumena Rêveber a KCK’ê û endamê KNK’yê Zubeyir Aydar di axaftina xwe de got ku bi bîranîna salvegera Peymana Lozanê li bajarê Lozanê panel û çalakî dê bên lidarxistin.

Aydar diyar kir ku armanca van çalakiyan ne tenê nîqaşkirina rabirdûyê ye, lê nêrîna li ser paşeroja gelê Kurd û rêyên yekîtiya neteweyî ye.

Wî got ku divê li ser partiyên Kurd baskeke civakî û neteweyî were avakirin da ku yekîtiya neteweyî pêk were û gelê Kurd bikare li hember xetereyên heyî bi helwesteke hevpar raweste.

“PÊVAJOYA YEKÎTIYÊ LI HEMÛ PARÇEAN BANDORÊN ERÊNÎ ÇÊDIKE”

Aydar got ku pêşketina yekîtiya neteweyî dê alîkariya parastina destkeftiyên Rojava bike, xetereyên li Başûr kêm bike, pêvajoya siyasî ya Bakur xurt bike û li Rojhilat derfetên nû biafirîne.

Her wiha hat diyarkirin ku ji bo meşandina xebatên konferansa neteweyî komîsyoneke nû dê were avakirin.

PEYAMA ÎNÎSÎYATÎFA YEKÎTIYA DEMOKRATÎK

Di civînê de peyama Înisiyatîfa Yekîtiya Demokratîk ya ji bo KNK’ê hat şandin jî hate xwendin.

Di peyamê de hate gotin ku KNK ji roja damezrandina xwe ve ji bo avakirina yekîtiya neteweyî karên girîng kiriye û di navbera her çar parçeyên Kurdistanê û diasporayê de roleke girîng lîstiye.

“DEM, DEMA YEKÎTIYÊ YE”

Înisiyatîfê di peyama xwe de bal kişand ser wê yekê ku gelê Kurd divê bi rêxistinbûn û yekîtiya demokratîk amadebe ji bo paşerojê.

Di peyamê de her wiha hate gotin ku bangewaziya “Aşti û Civaka Demokratîk” a Abdullah Öcalan ji bo pêvajoya nû girîng e û yekîtiya neteweyî dê hêza gelê Kurd li asta herêmî û navneteweyî zêde bike.

Di dawiya peyamê de şehîdên azadî bi rêzdarî hatin bîranîn û bang li hemû hêzên Kurd hat kirin ku piştgirî bidin xebatên yekîtiya neteweyî.