TEVÎ ATEŞBESTÊ JÎ TENSIYONA NAVBERA DYEWLETÊN YEKBÛYÎ YÊN AMERÎKA Û ÎRANÊ BILIND DIBE

Tevî ku di 8’ê Nîsanê de navbera Dewletên Yekbûyî yên Amerîka û Îranê de ateşbestek ketibû meriyetê, lê tensiyona herêmê dîsa zêde bûye. Washington ragihand ku di dawiya hefteyê de li başûrê Îranê êrîşên asmanî li ser pergalên radarê û navendên kontrola balafirên bêmirov pêk anîne. Ev pêşveçûn wek nîşana ku hewildanên dîplomatîk ji bo bidawîkirina şer hatine astengkirin tê nirxandin.

Nûçeyên ku di rojên dawî de di medyayê Amerîkayî de derketin û tê de hat gotin ku Washington daxwazên nû li Tahranê pêşkêş kiriye, hêviyên gihîştina lihevhatinekê kêm kirin. Tevî peyamên erênî yên berê yên Serokê Dewletên Yekbûyî Donald Trump, tê gotin ku di danûstandinan de pêşketinek girîng nehatiye tomarkirin.

Di dema ku tevgerên leşkerî li qada şer berdewam dikin, Fermandariya Navendî ya Hêzên Amerîkayê (CENTCOM) ragihand ku di rojên Şemî û Yekşemê de li başûrê Îranê gelek operasyonên asmanî pêk anîne. Li gorî daxuyaniyê, ev operasyon bi armanca parastinê hatine kirin û di demeke kurt de pêla sêyemîn a êrîşan e.

CENTCOM di daxuyaniya xwe de got ku pergalên radarê û navendên kontrola balafirên bêmirov li Girava Qeşmê û bajarê Gorukê yên li Tengava Hurmuzê hatine armanckirin. Artêşa Amerîkayê îdia kir ku ev êrîş bersivek bû li hember xistina balafirekî bêmirovî ya cureyê MQ-1 ku li avên navneteweyî dixebitî û ji aliyê Îranê ve hate xistin.

Di heman demê de, Hêzên Pasdarên Şoreşa Îranê ragihandin ku wan li dijî bingehek leşkerî ya ku di êrîşên Amerîkayê de hatibû bikaranîn operasyon pêk aniye. Lêbelê, cihê bingehê hate armanckirin nehat eşkerekirin.

Di aliyekî din de, artêşa Kuweytê ragihand ku welat bi êrîşên balafirên bêmirov û mûşekan re rû bi rû maye.

Her du aliyan berê jî hev bi binpêkirina ateşbestê tawanbar kiribûn. Bi taybetî piştî êrîşên Amerîkayê li başûrê Îranê û êrîşên li ser Kuweytê, sûcdarkirinên dijberî dîsa gur bûn.

Domandina operasyonên leşkerî yên du aliyan xofên derbarê bilindbûna tensiyonê û lawazbûna hêviyên çareseriya dîplomatîk zêde kiriye.