LI QAMIŞLOYÊ ETKÎNÎYÊN CEJNA ZIMANÊ KURDÎ DIDOMIN

Li Qamişloyê çalakiyên çandî yên ku ji bo 15’ê Gulanê Cejna Zimanê Kurdî tên lidarxistin berdewam dikin. Ji aliyê Meclîsa Edebiyatê ya Qamişloyê û Yekîtiya Ronakbîrên Kurdistana Rojava (HRRK) ve çalakiyên zarokan, pêşandana fîlman û guhdariya helbestan hatin lidarxistin.

Meclîsa Edebiyatê ya Qamişloyê di çarçoveya Cejna Zimanê Kurdî de li Pirtûkxaneya Şilêr a Tirbespiyê bernameyek taybet ji bo zarokan amade kir. Di çalakiyê de Grupê Şehîd Bawer ê Tirbespiyê stranên Kurdî gotin û beşdaran jî bi govendan beşdarî şahiyan bûn.

Her wiha meclîsê li Pirtûkxaneya Şilêr a Qamişloyê fîlmek li ser êş û aciyên gelê Kurd di dema şerê Îran û Iraqê de pêşan da. Di fîlmê de dijwariyên civaka Kurd û trajediyên mirovahî yên wê demê hatin vegotin.

Di heman demê de Yekîtiya Ronakbîrên Kurdistana Rojava (HRRK) ji bo Cejna Zimanê Kurdî ji bo pirtûka helbestan a Hozan Girkund ya bi navê “Henasên Te” roja îmzeyê û guhdariya helbestan lidarxist.

Etkinlik bi sernavê “Zimanê Me Nasnameya Me Ye” li navenda yekîtiyê ya li Qamişloyê hate lidarxistin. Gelek helbestvan, nivîskar, edebiyatnas û ronakbîr beşdarî bernameyê bûn.

Di dawiya çalakiyê de Hozan Girkund pirtûka xwe ya “Henasên Te” ku tê de mijarên evînê, penaberiyê, welatparêziyê û rexneya civakî bi zimanekî edebî hatiye xebitandin ji bo xwendevanan îmze kir.