SEROK BARZANÎ JI BO DÎVANA SEROKATIYA NÛ YA MECLÎSA NÛNERÊN IRAQÊ PEYAMA PÎROZBAHÎYÊ ŞAND

Serok Mesûd Barzanî, di dema 6. demeya yasayî ya Meclîsa Nûnerên Iraqê de, bi peyameke ku weşand, serok û du cîgirên nû yên Meclîsê pîrozbahî kir.

Barzanî di peyama xwe ya ku li ser platforma Xê parve kir de, Serokê Meclîsa Nûnerên Iraqê Heybet Helbusî, Cîgirê Yekem ê Serokê Meclîsê Adnan Feyhan û Cîgirê Duyem ê Serokê Meclîsê Ferhad Etrûşî pîrozbahî kir û ji wan re serkeftin xwest. Ew hêvîdar bû ku divana serokatî ya nû bi berjewendiya gelê Iraqê bixebite û ev hilbijartin bibe gavêk ji bo çareserkirina pirsgirêkan û xurtkirina biratî û lihevhatina hemû pêkhateyên Iraqê.

Di rûniştina yekem a 6. demeya yasayî ya Parlamentoya Iraqê de ku hilbijartin pêk hat, Ferhad Etrûşî, ku endamê Partiya Demokrat a Kurdistanê (PDK) ye, bi piştgiriya piraniya mutleq ji bo postê Cîgirê Duyem ê Serokê Parlamentoyê hat hilbijartin. Hilbijartin sê doran domand û di encamê de Etrûşî bi desthilatîyê hate diyarkirin.

Di heman demê de, Şaxewan Abdullah ku ji bo heman postê bû berendam, piştî du dorên dengdanê ku tê de dengên pêwîst nehatin bidestxistin, li gorî biryara partiya xwe ji berendamiyê vekişî. Serok Barzanî di vê derbarê de got ku berjewendiyên gelê Kurdistanê û partiyê pêwîst dikirin ku Dr. Şaxewan ji pêvajoya berendamtiyê vekişe. Ew di heman demê de Şaxewan Abdullah wek kesekî jêhatî û dilsoz nas kir û destnîşan kir ku li kîjan post an wezîfeyê ku be jî, ew bi rêzdarî û bawerîyê karên xwe bi cih tîne.

Ji akademiyê ber bi siyasetê

Ferhad Etrûşî, ku wek Cîgirê Duyem ê Serokê Parlamentoya Iraqê hate hilbijartin, bi raboriya xwe ya akademîk û îdarî balê dikişîne. Ew di sala 1976’an de li Duhokê ji dayik bû. Etrûşî xwedî doktora (PhD) di warê Hiqûqa Navneteweyî de ye. Berî ku têkeve siyaseta aktîf, ew li Zanîngeha Duhokê wek mamosteyek kar kir. Di navbera salên 2010-2014’an de, ew wek endamê Parlamentoya Iraqê û Komîsyona Hiqûqê kar kir.

Etrûşî di navbera salên 2014-2020’an de jî wek Walîyê Duhokê xizmet kir. Bi hilbijartina Ferhad Etrûşî, divana serokatî ya nû ya Parlamentoya Iraqê bi temamî hate şekilandin.