ZUBEYDÎ: DÎROK Û AVAKIRINA PÊŞMERGE Û DSG BI TEMAMÎ JI HEV CUDA NE

Wezîrê berê yê Karên Hundir û Darayî yê Iraqê, Beqir Cebr Zubeydî, li ser nîqaşên derbarê tevlêkirina hêzên Pêşmergeyê bo artêşa Iraqê de nirxandin kir û got ku dîroka, awayê avabûnê û rewşa siyasî ya Pêşmerge û Hêzên Sûriya Demokratîk (DSG) ji hev cuda ne.

Zubeydî di nivîsa xwe ya ku li ser hesabê fermî yê Facebookê belav kir de got ku di hin raporan de tê îddîakirin ku DYA bi rêya nûnerê xwe Tom Barrack dixwaze ezmûna Rojava li Iraqê dubare bike û bi belavkirina hêzên Pêşmergeyê wan bike nav artêşa Iraqê.

Zubeydî li dijî berawirdkirina Pêşmerge û DSG rawesta û got ku li gorî têkiliyên wî yên dîrokî bi serokatiya Kurd re, ku ji destpêka salên 1980’an ve didomin, her du avahî di warê dîrokî de ji hev gelek cuda ne.

Zubeydî diyar kir ku Pêşmerge ji nav civaka Kurd derketiye û tenê wekî hêzeke leşkerî nayê nirxandin. Li gorî wî, pêvajoya avabûna DSG cuda ye.

Zubeydî bi balkişandina ser wateya dîrokî û civakî ya Pêşmerge ji bo Kurdan, girîngiya Mela Mustafa Barzanî wekî rêberê manewî ya vê hêzê anî ziman. Wî got ku bandora Barzanî îro jî li herêmê tê hîskirin û ragihand ku serokê berê yê Iraqê Celal Talabanî jî di hevdîtin û serdanên xwe de role dîrokî ya Barzanî gelek caran bi bîr xistiye.

“HERÊMA KURDISTANÊ QEBÛLA NAVNETEWEYÎ GIRTIYE”

Zubeydî di nirxandina xwe de cih da rewşa hiqûqî û dîplomatîk a Herêma Kurdistanê jî. Wî got ku Herêma Kurdistanê ji serdema rejîma Baas ve heta niha di astekê de avahiyeke xweser ava kiriye û di qada navneteweyî de hatiye pejirandin. Zubeydî her wiha got ku DSG, tevî ku li Sûriyê herêmeke fireh kontrol dike, nikariye avahiyeke siyasî ya bi heman rengî ava bike.

Zubeydî got ku avahiya taybet a Pêşmergeyê divê were parastin û ev hêz divê di çarçoveya ewlehiya Iraqê de li ser bingeha diyalog û koordînasyonê were nirxandin.

Zubeydî diyar kir ku tevgera Pêşmergeyê bi koordînasyona Fermandariya Giştî ya Hêzên Çekdar ên Iraqê re dikare vê hêzê ji bo ewlehiya Iraqê hêzeke bihêztir bike.