LI ÎLAMÊ Û “7 ENDAMÊN PARTIYÊN KURD HATINE GIRTIN” ÎDÎAYÊ, PARTIYÊN ROJHILATÊ RED KIRIN

Artêşa Parastinên Şoreşê ya Îranê ragihand ku li parêzgeha Îlamê komeke 7 kesî ya ku tê îddîakirin endamê partiyên Kurd ên Rojhilatê Kurdistanê ye, hatiye girtin. Nûnerên partiyên Kurd ên Rojhilatê Kurdistanê bi awayekî zelal îdîayê red kirin û daxuyaniya Parastinên Şoreşê wekî “bêbingeh” binav kirin.

Di daxuyaniya Parastinên Şoreşê de hat îddîakirin ku 7 kesên hatine girtin bi “serokek” ku li derveyî Rojhilat û Îranê ye re têkildar in û ji bo pêkanîna “çalakiyên hilweşîner” li bajarên rojavayê Îranê piştgiriya darayî wergirtine.

Li gorî daxuyaniyê, piştî ku çalakiyên komê hatin tesbîtkirin, di operasyona ku hate destpêkirin de 7 kes hatin girtin û hejmarek çek û cebilxane hatin desteserkirin.

Berpirsiyarê Têkiliyên Hewlêrê yê Partiya Demokrat a Kurdistanê ya Îranê (PDK-Î), Amanc Zibayî, daxuyaniya Parastinên Şoreşê ji Rûdawê re nirxand. Zibayî got ku ev haber bi tevahî bêbingeh e û kesên ku hatine girtin îddîakirin bi PDK-Î an jî partiyên din ên Rojhilatê re tu têkiliya wan tune ye.

Zibayî îddîa kir ku ev daxuyanî bahane ye ku rejima Îranê bi wê zexta xwe li ser gel zêde bike û rê li ber darvekirinan veke.

Berpirsiyarê Têkiliyên Hewlêrê yê Komala, Emced Huseynpenahî, jî îddîaya ku endamên wan li Rojhilatê hatine girtin red kir. Huseynpenahî got ku tu yek ji partiyên Rojhilatê niha li navenda Îranê çalakiyên çekdarî yên wekî yên ku Parastinên Şoreşê îddîa dike pêk nîne.

Huseynpenahî diyar kir ku daxuyaniya Parastinên Şoreşê zêdetir wekî propagandeyekê xuya dike ku rejimê dixwaze nîşan bide ku rewşa heyî ya li welêt di bin kontrola wan de ye. Wî got ku Îranê di rabirdûyê de jî bi bahaneyên bi vî rengî gelek kes darve kirine û piştre derketiye holê ku ew bêguneh bûn.

Rêveberiya Tehranê gelek caran partiyên Kurd ên Rojhilatê bi hewldana ketina nav axa Îranê û Rojhilatê, xerabkirina ewlehiya welêt û afirandina bêîstiqrariyê tawanbar dike. Partiyên Rojhilatê jî van tawanbariyan red dikin û dibêjin ku heta niha tu hewldaneke wan tune ye ku serweriya axa Herêma Kurdistanê binpê bike an jî ji sînor re derbasbûneke neqanûnî pêk bîne.