GENERALÊ PAYEYA BILIND LI DYA YE: MA AMADEKARIYA ÊRÎŞEKE NÛ LI SER ÎRANÊ HEYE?

Hat ragihandin ku Wezîrê Parastinê yê Dewletên Yekbûyî, Pete Hegseth, Korgeneral Brett Sylvia, ku berpirsiyariya rêveberiya stratejî, plansazî û siyasetê di nav Şêwirmendiya Giştî ya Artêşê de dikir, ji wezîfeya xwe dûr xistiye. Ev biryar di demekê de hatiye girtin ku Serokê Dewletên Yekbûyî Donald Trump vebijarkên êrişên nû li ser Îranê dinirxîne. Lê sedema fermî ya dûrxistina Sylvia’yê ji wezîfeyê nehatiye eşkerekirin.

Li gorî nûçeyên çapemeniya Amerîkayê, Korgeneral Sylvia, ku endamê Hêzên Bejayî yên Amerîkayê ye, ji serê beşa stratejî, plansazî û siyasetê ya Şêwirmendiya Giştî ya Artêşê, ku bi navê J5 tê naskirin, hatiye dûrxistin. Berpirsên parastinê ragihandine ku heta niha kesekî din ji bo cihê wî nehatiye tayînkirin.

Beşa J5 di amadekirina stratejiyên leşkerî û planên operasyonan de, bi hevahengiya Serokê Şêwirmendiya Giştî ya Artêşê û rêveberiya serokatiyê, roleke girîng dilîze. Dûrxistina Sylvia’yê wekî beşek ji guhertinên domdar ên di nav kadroyên leşkerî yên payebilind ên Pentagonê de tê nirxandin. Sylvia bû kesê duyem ê ku di serdema wezîrê parastinê Hegseth de ji serê beşa J5 tê dûrxistin. Berê, Korgeneral Joseph McGee jî di Cotmeha 2025’an de ji wezîfeya xwe ayrî bû.

SEDÊMA DÛRXISTINÊ NEHATIYE EŞKEREKIRIN

Wezareta Parastinê ya Amerîkayê heta niha sedemeke fermî û eşkere ji bo dûrxistina Sylvia’yê ragihandî nake. Her wiha hatiye gotin ku heta niha kesekî din li şûna wî nehatiye tayînkirin. Berdevkê Şêwirmendiya Giştî ya Artêşê ji Sylvia û malbata wî re ji bo 32 salên xizmeta wan spas kir û ji wan re di qonaxên bê de serkeftin xwest.

VEBIJARKÊN ÊRIŞÊN NÛ YÊN TRUMP LI SER ÎRANÊ DI ROJÊ DE NE

Dûrxistina Sylvia’yê di demekê de pêk hatiye ku rêveberiya Trump îhtîmala destpêkirina operasyonên leşkerî yên nû li dijî Îranê dinirxîne. Li gorî nûçeyên çapemeniya Amerîkayê, Washington piştî hilbijartinên navîn ên ku tê plan kirin di 3’ê Mijdarê de, vebijarkên êrişên nû li ser Îranê di nîqaşê de dihêle. Lê hatiye ragihandin ku Trump hîn biryareke dawî negirtiye.

Her wiha hatiye ragihandin ku berpirsên Amerîkayê ji hin welatên herêmê re peyam şandine ku ji bo êrişên nû yên gengaz û bersiva muhtemel a Îranê amade bin. Şandina leşkerên zêde û keştiyeke balafirgehanê ya leşkerî ber bi herêmê ve jî di nav pêşketinên ku tên nirxandin de ye.

Derbarê wê yekê de ku gelo dûrxistina Sylvia’yê rasterast bi amadekariyên êrişên gengaz li ser Îranê ve girêdayî ye an na, daxuyaniyeke fermî tune ye. Ji ber vê yekê, şîroveyên ku vê guhertina kadroyê wekî nîşana biryara êrişeke nû dibînin, heta niha nehatine piştrastkirin.