SOHR AZADKIRINA GIRTIYÊN KURD ÊN JI EFRÎNÊ BIRINE TIRKIYÊ XWEST

Çavdêriya Mafên Mirovan a Sûriyê (SOHR) ragihand ku 4 zilamên Kurd, ku nêzî 8 sal berê ji Efrînê hatibûn girtin û biribûn Tirkiyeyê, hatine berdan. Çavdêriyê diyar kir ku girtiyên din hîn jî di girtîgehên Tirkiyeyê de ne. SOHR bang li desthilatdarên Tirk kir ku rewşa hemû girtiyan eşkere bikin, îdiayên îşkence û muameleya xirab lêkolîn bikin û berpirsiyar hesab bidin.

Li gorî daxuyaniya ku SOHRê roja Şemiyê da, di Tebaxa 2018’an de polîsên sivîl ên Tirk, bi pê re karmendên îstîxbaratê, 13 ciwan ji gundê Omar Uşaqî yê girêdayî Efrînê û kesekî din ji gundekî nêzîk girtin. Hate gotin ku ev kes bi îdiaya têkildarbûna wan bi Rêveberiya Xweser a Bakur û Rojhilatê Sûriyê hatibûn girtin.

Çavdêriyê ragihand ku kesên hatibûn girtin pêşî di dibistaneke li gundê xwe de hatibûn ragirtin û li wir rastî lêdan û îşkenceyê hatibûn. Paşê ew biribûn dibistaneke li gundekî cîran. Herwiha hate gotin ku berî birina wan bo Girtîgeha Samsunê ya li Tirkiyeyê, ji malbatên wan pereyên pir mezin hatibûn xwestin.

Li gorî agahiyên SOHRê, di dadgeha ku di 12’ê Kanûna 2019’an de li Hatayê hat lidarxistin de, 11 ji girtiyan bi cezayên cihêreng ên girtîgehê, di nav de cezayê zindanê heta hetayê, hatin mehkûmkirin.

Çavdêriyê bang li desthilatdarên Tirk kir ku rewşa hemû girtiyên Kurd ên Rojava eşkere bikin, îdiayên îşkence û muameleya xirab lêkolîn bikin û cezayên hatine dayîn ji nû ve binirxînin. SOHR’ê herwiha azadkirina kesên ku bi awayekî keyfî tên ragirtin xwest û bang kir ku berpirsiyarên binpêkariyan hesab bidin.