JI BO RIZA ALTUN LI MAXMÛRÊ MERASIMA BÎRANÎNÊ HAT LIDARXISTIN

Riza Altun, ji kadroyên pêşeng ên PKK’ê, di 7’emîn salvegera şehadeta xwe de li Meclisa Malbatên Şehîdan a Maxmûrê bi merasimeke bîranînê hat anîn bîra xwe.

Komeleya Malbatên Şehîdan a li Kampiya Penaberan a Şehîd Rûstem Cudî ya Maxmûrê kar dike, ji bo 7’emîn salvegera şehadeta Riza Altun, ji kadroyên pêşeng ên PKK’ê, merasimeke bîranînê li dar xist.

Di merasima bîranînê ya li Navenda Meclisa Malbatên Şehîdan de nûnerên saziyan, xwendekar û gelek kes beşdar bûn.

Qedrî Şirîşî, berdevkê Meclisa Malbatên Şehîdan, di axaftina xwe de got ku di dirêjahiya têkoşîna azadiya Kurdistanê de şahidê şehadeta gelek şoreşgerên pêşeng bûne.

Şirîşî diyar kir ku Riza Altun di warê civakî û leşkerî de roleke pêşeng bi serkeftî pêk aniye. Wî got ku têkoşîna azadiyê sînor nas nake û gelê Kurd bi têkoşîna li ser vê bingehê karîye hebûna xwe îsbat bike.

Merasima bîranînê bi dirûşmeyên “Bijî Serok Apo” û “Şehîd Namirin” bi dawî bû.