ERDOĞAN: “MAYÊ PÊVAJOYÊ GIRTÎYE, EM JI HILWEŞÎNA DSGÊ LI SÛRIYÊ RAZÎ NE”

Serokkomarê Tirkiyeyê Recep Tayyip Erdoğan, di dema vegera xwe ji Qirgizistanê de li ser balafirê bersiva pirsên rojnamevanan da û derbarê pêvajoya “Tirkiyeya bê Teror”, entegrasyona leşkerî ya li Sûriyê, têkiliyên bi Yewnanistanê re, şerê Rûsya-Ukrayna û siyaseta parastinê nirxandin kir.

Erdoğan derbarê “qanûna çarçoveyê” ya ku bi piraniya mezin ji Meclîsa Mezin a Neteweya Tirkiyeyê derbas bû û hêviyên bêçekbûna PKKê de got ku dayîna dîrokeke diyarkirî ji bo pêvajoyê ne rast e. Wî diyar kir ku pêvajo divê ji dêvla ku wek mijareke dîrokê were dîtin, wek armancekê were nirxandin. Her wiha got ku ji bo destpêkirina sepandina qanûnê, rêxistin divê bi awayekî rastîn çekan berdê û were tasfiye kirin.

Erdoğan îdia kir ku pêvajo gav bi gav pêş ve diçe û got: “Gel vê pêvajoyê maye kiriye û may jî girtiye.” Wî diyar kir ku yekbûna civakî nayê wateya ji holê rakirina cudahiyan û vê yekê bi navê “Lihevhatina Mezin a Tirkiyeyê” binav kir.

ERDOĞAN PIŞTGIRIYA HILWEŞÎNA DSGÊ KIR

Erdoğan biryara hilweşandina Hêzên Sûriya Demokratîk (DSG) û entegrasyona wan di artêşa Sûriyê de nirxand û got ku ji vê pêşketinê razî ne.

Wî diyar kir ku biryara hatî dayîn û pêvajoya entegrasyonê erênî dinirxînin û rewşa sepandina biryarê li qadê dişopînin. Erdoğan got ku dixwazin Sûriye bi hemû pêkhateyên xwe re yek û yekpare be û îdia kir ku Serokkomarê Sûriyê Ahmed Şara pêvajoyên dijwar bi serkeftî birêve dibe.

Erdoğan got ku ji pêvajoya entegrasyonê hêvîdar in û axaftina xwe bi gotina “Divê pelê terorê êdî were girtin, divê serdema çek û tundiyê êdî bi dawî were” qedand.

“AMERÎKA HAT SER RÊYA KU TIRKIYE BI SALAN PARASTIYE”

Erdoğan li ser guhertina siyaseta Amerîkayê ya li Sûriyê jî axivî û got ku nêzîkatiya Washingtonê ya li ser avakirina Sûriyeyeke “bi yek artêşê” bi rêya ku Tirkiye bi salan parastiye re hevaheng e.

Erdoğan got ku Tirkiye ji salan ve dibêje ku Sûriye nebe qada çalakiyên rêxistinên terorîst û diyar kir ku pêşketinên li Sûriyê rastiya vê nêzîkatiyê nîşan didin. Wî her wiha bang li welatên herêmê kir ku piştgirî bidin ji nû ve avakirina Sûriyê.

BANGA “BÊÇEKBÛNÊ” JI YEWNASISTANÊ RE

Erdoğan derbarê tevgera leşkerî ya li giravên Egeyê de got ku Tirkiye dixwaze bi Yewnanistanê re li ser bingeha cîranîtiya baş têkiliyan bimeşîne. Wî got ku Yewnanistan divê ji çekdarkirina giravên ku li gorî peymanên navneteweyî statûya wan ne-leşkerî ye dev jê berde û bang li Atînayê kir ku ji “rêya şaş” vegere.

ŞERÊ RÛSYA-UKRAYNA Û EWLEHIYA DERYAYA REŞ

Erdoğan behsa civîna xwe ya bi Serokkomarê Rûsyayê Vladimir Putin re jî kir û got ku divê şerê Rûsya-Ukrayna bi dawî bibe. Wî diyar kir ku ji bo ewlehiya veguhestina sivîl û bazirganiyê ya deryayî li Deryaya Reş mekanîzmayeke domdar pêwîst e û got ku divê berî ku krîza genimê mezin bibe gav bên avêtin.

GIRÎNGIYA “HEVPEYMANA MEKKÊ”

Erdoğan bal kişand ser girîngiya civîna sê aliyan a Tirkiye, Pakistan û Erebistana Siûdî ya li Stenbolê hat lidarxistin. Wî got ku di civînê de mijarên wekî pîşesaziya parastinê, perwerdeya leşkerî û parvekirina imkanan hatin nirxandin.

Erdoğan got ku ev hevkariyê ji bo îstîqrar û ewlehiya herêmê hatiye avakirin.

F-35 Û S-400: “VEBIJARKÊN TIRKIYE ZÊDE DIBIN”

Erdoğan derbarê pêşketinên di pîşesaziya parastinê de got ku danûstandinên ji bo vegera Tirkiyeyê bo bernameya F-35 hîn didomin. Wî got ku piştî qedandina pêvajoyên li Amerîkayê dibe ku ev mijar li paş were hiştin.

Lê Erdoğan diyar kir ku Tirkiye ji projeya KAANê dev nake û pêşdebirina pergalên xwe yên parastina hewayî didomîne. Wî got ku Tirkiye vebijarkên xwe di warê parastinê de zêde dike û ev yek “Tirkiyeya bihêz” e.