CIWANÊN DEM PARTÎYÊ JI BO AZADIYA FÎZÎKÎ YA RÊBER APO BIRYARA ÇALAKÎ Û ETKÎNLÎKAN GIRT

Koordînasyona Jinên Ciwan û Meclîsa Ciwanan a Partiya Wekhevî û Demokrasiya Gelan (DEM Partî), piştî civînên ku li Amedê pêk anîn, di daxuyaniya encamê de ragihand ku ji bo bilindkirina daxwaza azadiya fîzîkî ya Rêber Apo dê rêze çalakî û etkînlîk werin lidarxistin.

Di daxuyaniyê de hate gotin ku di perwerdehiya navendî ya 1-4 Tîrmehê û Civîna Meclîsa Giştî ya 5 Tîrmehê de pêvajoya Aştî û Civaka Demokratîk, rewşa siyasî ya Kurdistanê, Tirkiyeyê û cîhanê bi berfirehî hate nirxandin û planên demên pêş hatin amadekirin.

Hat diyarkirin ku Banga Aştî û Civaka Demokratîk a 27’ê Sibatê her roj ji aliyê civakê ve bêtir tê fêmkirin û avakirina civaka demokratîk bi rêxistin û xebata kolektîf pêk tê. Di daxuyaniyê de hate bal kişandin ku ji bo pêşveçûna vê pêvajoyê azadiya fîzîkî ya Rêber Apo pêwîst e û ciwanan di Mîtîngên Azadiyê de vê daxwazê bi awayekî xurt nîşan dane.

Herwiha hate gotin ku 43 rojan e bi Rêber Apo re tu hevdîtin pêk nehatiye û divê statûya wî zû were diyarkirin. Di vê pêvajoyê de rola pêşeng ya ciwanan û jinan hate xêzkirin.

Di civîna Jinên Ciwan de jî tundiya li dijî jinan, polîtîkayên bêcezakirinê û kuştina jinan hatin nirxandin. Hat gotin ku parastina xwe ya jinan divê bi rêxistina jinên ciwan were xurtkirin û jiyana demokratîk û azad a hevpar were belavkirin.

Di daxuyaniyê de Zirveya Rêberên NATO’yê ya 7-8 Tîrmehê li Enqereyê jî hate nirxandin. Hat gotin ku zirve armanca zêdekirina lêçûnên parastinê û pêşkêşkirina pîşesaziya çekan li bazara navneteweyî heye û girtin û binçavkirinên berî zirveyê hatin rexnekirin.

BIRYARÊN HATINE GIRTIN

Di encamnameyê de hat ragihandin ku ji bo bilindkirina daxwaza azadiya fîzîkî ya Rêber Apo li Tirkiye û Kurdistanê dê çalakî û etkînlîk werin lidarxistin.

Herwiha ji bo agahdarkirina ciwanan li ser Pêvajoya Aştî û Civaka Demokratîk û zêdekirina beşdarbûna wan, dê civînên li qadên vekirî û çalakiyên temayî werin lidarxistin.

Di heman demê de hat biryardan ku bernameya perwerdehiya navendî ya li Amedê li bajar û navçeyan jî were belavkirin û di 18-19 Tîrmehê de li Enqereyê ji aliyê Komîsyona Têkiliyên Derve ya Meclîsa Ciwanan a DEM Partî ve li ser rola ciwanan di dîplomasiya netewa demokratîk de şanoyek were lidarxistin.