BARRACK BI SEROKWEZÎRÊ IRAQÊ RE LI BEXDAYÊ CIVÎYA: BANGAWAZA QESRA SPÎ Û HEVKARIYA STRATEJÎK HATIN AXAFTIN

Nûnerê Taybet ê Serokê DYA Donald Trump ji bo karûbarên Iraq û Sûriyeyê Tom Barrack û Serokwezîrê Iraqê Ali Falih el-Zeydi li Bexdayê civiyan û li ser pêşeroja têkiliyên stratejîk, hevkariya ewlehiyê û projeyên aborî nîqaş kirin.

Li gorî daxuyaniya Ofîsa Ragihandinê ya Serokwezîrtiya Iraqê, her du aliyan piştgirîya xwe ji bo zêdekirina hevkariya navbera Washington û Bexdayê dubare kir.

Di civînê de Tom Barrack nameya vexwendinê ya Serokê DYA Donald Trump radestî Serokwezîr Ali Falih el-Zeydi kir. Di nameyê de hatibû gotin ku Qesra Spî di nîvê meha Tîrmehê de bi kêfxweşî el-Zeydi mêvandarî dike û li ser pêşeroja têkiliyên her du welatan civînên berfireh dê bên lidarxistin.

Yek ji mijarên girîng ên civînê ewlehiya Iraqê bû. Her du aliyan li ser komkirina çekan di bin kontrola dewletê de û betalkirina komên çekdar ên ku li derveyî saziyên fermî dixebitin, nîqaş kirin.

Serokwezîr el-Zeydi bal kişand ku hikûmeta wî dixwaze têkiliyên bazirganî û veberhênanê bi DYA re berfireh bike. Barrack jî got ku gavên aborî û teknolojîk ên ku Iraq di demên dawî de avêtiye erênî dibîne.

Di civînê de destûra çalakiyê ya Starlink li Iraqê, û destpêkirina danûstandinên bi Chevron re ji bo pêşxistina zeviyên neftê yên Batı Qurna-2 û Nasiriye jî hatin nîqaşkirin.

Herwiha projeyên nûkirina xeta boriyê ya Kerkûk-Banyas, berfirehkirina hevkariya di sektora elektrîkê de û avakirina tesîsek li ser avê ji bo xebitandina gaza xwezayî ya şilkirî li Hor ez-Zubeyrê jî hatin axaftin.

Di dawiya civînê de her du aliyan girîngiya piştgirîkirina Iraqeke demokratîk, federal, serbixwe û yekgirtî ya ku li ser saziyên destûrî ava bûye, xistin pêş.