KARASU: PÊDIVÎ BI GAVÊN PRAKTÎK HEYE JI BO ENTEGRASYONA DEMOKRATÎK

Endamê Meclîsa Rêveber a KCK’ê Mustafa Karasu di derbarê Pêvajoya Aştî û Civaka Demokratîk de got ku ji bo pêşketina pêvajoyê divê hikûmet gavên konkret bavêje. Karasu got ku bêyî demokratîkbûnê nîqaşên “entegrasyona demokratîk” bêwate dibin.

Karasu ku bi bîranîna şehîdên Gulanê dest bi axaftinê kir, got ku tekoşîna azadiya Kurdan bi fedakariyên şehîdan gihîştiye vê astê. Wî diyar kir ku biryara fesxkirina PKK’ê û dawî anîna şerê çekdar li dijî Tirkiyeyê qonaxeke dîrokî ye û got ku di qonaxa nû de siyaseta demokratîk û tekoşîna mafî dê bingeh bê.

Karasu diyar kir ku piştî bangewaziya Abdullah Öcalan ya 27’ê Sibata 2025’an ya “Aştî û Civaka Demokratîk” hereketê agirbest ragihand û ji bo pêşveçûna pêvajoyê hewl da. Lêbelê, ji ber ku dewlet gavên pêwîst neavêtine, pêvajo gihîştiye qonaxa qefilandinê.

Karasu li ser nîqaşên “tesbît û piştrastkirina” çekdanê jî rawestiya û got ku ev mijar bûye demagojiyeke siyasî. Wî got: “Me şerê li dijî Tirkiyeyê bi dawî kir, lê em mecbûrin li herêmên xwe xwe biparêzin. Dewletek ku dixwaze pêvajoyê pêş bixe divê van nîqaşan mezin neke.”

Karasu bal kişand ser girîngiya diyarkirina statûya Abdullah Öcalan û got ku qutbûna hevdîtinan ne rast e. Wî got ku divê Öcalan bi awayekî azad bi rojnamevan, siyasetmedar û cûrbecûr beşên civakê re biaxive.

Karasu di derbarê zextên li dijî muxalefetê de jî got ku taybetî nêzîkatiya li dijî CHP’yê civakê aciz kiriye. Wî got ku di pêvajoyeke ku armanca wê demokratîkbûn e de zexta li ser muxalefetê zirarê dide pêvajoyê.

Di derbarê Rojava’yê de jî Karasu rexne li derxistina Kurdî ji qada giştî kir û bang li gelê Kurd kir ku ziman û nasnameya xwe biparêze. Wî got ku tunekirina Kurdî nayê qebûlkirin.