DAYIKA ŞEHÎD CIWAN EREB: CIWAN ŞEHÎDÊ KURDISTANÊ YE

Li Qamişloyê bi beşdariya sedan kesan ji bo şehîd Ciwan Ereb (Ciwan Îbrahîm) merasîmeke bîranînê hate lidarxistin. Di merasîmê de dayika şehîd Enîsa Tobal axivî û got: “Ciwanê min fermandarek e. Wî xwe ji bo welatê xwe feda kir. Ew şehîdê Kurdistanê ye.”

Merasîm li Salona Rehme pêk hat. Salon bi wêneyên şehîd Ciwan Ereb û Önder Apo, her wiha bi alayên Yekîneyên Parastina Gel (YPG) û Yekîneyên Parastina Jin (YPJ) hatibû xemilandin.

Di merasîmê de malbata şehîd Ciwan Ereb, endam û rêveberên Meclisa Malbatên Şehîdan, nûnerên saziyên cuda, rêxistin û partiyên siyasî, gelên herêmê, endam û rêveberên Hêzên Ewlekariya Navxweyî ji bajarên cuda yên Rojava û gelê Qamişlo amade bûn. Beşdaran bi wêneyên şehîd û dirûşma “Şehîd namirin” ketin salonê.

Merasîm bi rêzgirtineke bêdeng dest pê kir. Piştre dayika şehîd Enîsa Tobal axivî û diyar kir ku ew bi kurê xwe serbilind e. Wê wiha got:

“Ciwanê min fermandarek e. Ciwanê min Simko-yê Şikak e, Şêx Seîd e. Wî xwe ji bo welatê xwe feda kir. Me ew bi welatparêziyê mezin kir. Ez bi wî serbilind im, ew şehîdê Kurdistanê ye.”

“ŞEHADETA CIWAN JI KURD, EREB Û SÛRYANIYAN RE PÎROZ BE”

Mûna Tobal, xala şehîd Ciwan Ereb, li ser navê malbatê axivî û silav li beşdaran kir. Wê diyar kir ku Ciwan kesayetiyeke mezin bû û tu peyv nikare wî bi tevahî rave bike.

Mûna Tobal got ku Ciwan bi laşê xwe ji wan dûr ketiye, lê ruhê wî bi hemûyan re ye. Wê wiha got: “Heta ku em hebin, ruhê wî dê bi me re be. Ez şehadeta wî ji hemû Kurdan, Ereb, xêrxwazan û hemû kesên ku azadiyê hez dikin re pîroz dikim. Ciwan, kurê min ê leheng, tu çûyî lê dê bi me re bimînî. Tu digot: ‘Em ê hîn jî Kurdistanê ava bikin, Rojava ava bikin.’ Ciwan, em bi te re ne.”

“EM Ê LI PEY ŞOPA WE BIMEŞIN”

Hisên Kesîr, ku li ser navê Meclisa Malbatên Şehîdan axivî, silav li hemû malbatên şehîdan û beşdarên merasîmê kir. Kesîr diyar kir ku ew di kesayetiya Ciwan Îbrahîm de hemû şehîdan bi bîr tînin û got ku ev şehîd di rêya felsefeya Önder Apo de meşiyane.

Kesîr anî ziman ku heval Ciwan Îbrahîm li Rojava kedeke mezin daye û soz da ku ev ked wê vala nemîne. Wî got ku ew wekî malbatên şehîdan û gelê welatparêz dê li pey şopa şehîdan bimeşin. Kesîr wiha got: “Wekî ku we tirs xiste dilê dijmin, em ê nehêlin ku ew tirs ji dilê dijmin derkeve.”

Di merasîmê de ji aliyê meclîsên taxên Qamişlo, partiyên siyasî û Kongra Star ve jî axaftin hatin kirin. Di van axaftinan de bal kişand ser ked û xebata şehîd Ciwan Ereb û soza domandina rêya wî hate dubarekirin.

Hate ragihandin ku merasîma bîranîna şehîd Ciwan Ereb dê du rojan din jî bidome.