BANGA LI BER GIRTÎGEHA SİNCANÊ: ASTENGIYÊN LI PÊŞBERÎ AŞTIYÊ RAKIN!

Di salvegera operasyona 4’ê Mijdara 2016’an ya li dijî siyasetmedarên Partiya Demokratîk a Gelan (HDP) de, Meclisa Jin a Partiya DEM li ber Kampusa Girtîgeha Sincanê daxuyaniyeke çapemeniyê da. Di daxuyaniyê de bang hate kirin ku biryarên Dadgeha Mafên Mirovan a Ewropayê (AİHM) bên sepandin, girtiyên siyasî bên berdan û astengiyên li pêşberî aştiyê bên rakirin.

Ji bilî nûnerên Partiya DEM, Seroka Giştî ya Partiya Şoreşger Elif Torun Öneren, her wiha nûnerên Partiya Avakirina Nû ya Sosyalîst (SYKP) û Partiya Kedê (EMEP) jî beşdarî daxuyaniyê bûn.

Hevserokê Parêzgeha Enqereyê ya Partiya DEM, Yılmaz Yıldırımcı, di axaftina xwe de operasyona li dijî HDP’ê wekî “derbeya siyasî” binav kir. Yıldırımcı got ku ew dê ji bo azadkirina siyasetmedarên hatine girtin têkoşînê bidomînin.

‘ASTENGIYA LI PÊŞBERÎ AŞTIYÊ ÇI YE?’

Berdevka Meclisa Jin a Partiya DEM, Halide Türkoğlu, diyar kir ku girtîgeh yek ji astengiyên herî mezin li pêşberî siyaseta demokratîk a Tirkiyeyê ne. Türkoğlu xwest ku biryarên AİHM’ê bên sepandin û hemû girtiyên siyasî bên berdan.

Türkoğlu tekez kir ku piştgirî û hevgirtina bi gel û jinên Kobanê re ne sûc e. Wê got ku zextên ku bi rêya dozên siyasî tên meşandin zirarê didin pêvajoya aştiyê.

Türkoğlu bal kişand ser daxwazên Dayikên Aştiyê yên ji bajarên cuda yên Tirkiye û Kurdistanê hatine Enqereyê. Wê bang li desthilatdariya siyasî û hemû partiyên siyasî kir û pirsên jêrîn pêşkêş kir: “Astengiya li pêşberî aştiyê çi ye? Çima siyasetmedar nagihîjin azadiya xwe? Çima girtiyên nexweş hîn jî azad nabin?”

Türkoğlu diyar kir ku azadkirina hemû girtiyan yek ji gavên bingehîn ên ji bo avakirina aştiya mayînde ye. Wê her wiha bal kişand ser girtiya 34 salan e Nedime Yaklav, ku berdana wê ji bo cara heftemîn hatiye astengkirin. Türkoğlu polîtîkayên li girtîgehan wekî “hiqûqa dijminatiyê” binav kir.

PEYAMA ZEYNEP KARAMAN HAT XWENDIN

Berî daxuyaniyê, Halide Türkoğlu peyama Zeynep Karaman, girtiya Doza Kobanê, ya ku wê di girtîgehê de serdana wê kiribû, xwend. Türkoğlu diyar kir ku Doza Kobanê mînakek e ku pirsgirêka Kurd bi nêzîkatiya înkar û polîtîkayên ewlehiyê tê nîqaşkirin.

Zeynep Karaman di peyama xwe de diyar kir ku pirsgirêka Kurd divê li ser bingeha veguherîna demokratîk bê çareserkirin. Wê got ku Banga Aştî û Civaka Demokratîk a Rêber Apo ya 27’ê Sibata 2025’an deriyê jiyaneke wekhev û demokratîk li Rojhilata Navîn vedike.

Karaman bal kişand ser têkoşîna azadî, demokrasî û aştiya mayînde û bang li jinan û gelan kir ku di pêvajoya çareseriya demokratîk de roleke çalak bilîzin.

Karaman peyama xwe bi van gotinan bi dawî kir: “Heke pêşeroj di vê kêliyê de tê afirandin, bila em vê kêliyê ji bo afirandina azadî û demokrasiya xwe binirxînin. Ji vê jiyaneke hêjatir û biqîmettir ji bo me tune ye. Em bi rûmet in, di nava têkoşîna xwe de ne. Em dibêjin ku dê azadî û demokrasî bi ser bikevin.”