LI BAKUR Û ROJHILATÊ SÛRIYÊ ÇALAKIYÊN JI BO PERWERDEYA BI ZIMANÊ KURDÎ: BERTEK JI ÊRÎŞÊN LI SER XWENDEKARAN RE

Li Bakur û Rojhilatê Sûriyê, xwendekar, malbat û înîsiyatîfên gelî li gelek bajarên çalakiyan li dar xistin û xwestin ku mafê perwerdehiya bi zimanê dayikê bê garantîkirin. Di xwepêşandanên li Girkê Legê, Çilaxa û Amûdê de parastina perwerdehiya bi Kurdî û garantîkirina wê di destûrê de hat xwestin. Her wiha gef û êrîşên li dijî xwendekarên ku li Hesekê daxwaza perwerdehiya bi zimanê dayikê kiribûn, hatin protestokirin.

LI GIRKÊ LEGÊ Û ÇILAXAYÊ MEŞÊN JI BO PERWERDEHIYA BI ZIMANÊ DAYIKÊ

Ji bo protestokirina biryara Wezareta Perwerdehiyê ya derbarê perwerdehiya bi Kurdî de, xwendekaran li Girkê Legê û Çilaxayê çalakî li dar xistin.

Xwendekarên li Girkê Legê li ser riya sereke meşiyan û daxwaza xwe ya perwerdehiya bi Kurdî anîn ziman. Wan xwest ku mafê perwerdehiya bi zimanê dayikê were parastin û garantîkirin. Xwendekaran diyar kir ku biryara hatî girtin li gorî mafê perwerdehiya bi zimanê dayikê nîne û tekez kirin ku ziman yek ji bingehên nasname û çandê ye.

Di xwepêşandana li Çilaxayê de jî xwendekaran xwestin ku rêz ji bangên perwerdehiya bi zimanê dayikê re bê girtin. Wan got ku perwerdehiya bi zimanê dayikê mafekî xwezayî ye.

LI AMÛDÊ MALBAT Û XWENDEKARAN BI HEV RE ÇALAKÎ LI DAR XISTIN

Xwendekar û malbatên wan li Meydana Şehîd Cihad a Amûdê kom bûn û ji bo garantîkirina mafê perwerdehiya bi Kurdî xwepêşandaneke bi beşdariya berfireh li dar xistin. Beşdaran bal kişand ser girîngiya parastina perwerdehiya bi zimanê dayikê û pankartên ku biryara têkildar a hikûmeta demkî red dikirin hildan.

Mamosteyê ziman û wêjeya Kurdî Beşir Mela Nevaf di axaftina xwe de diyar kir ku ji bo parastina zimanê Kurdî gelek bedel hatine dayîn. Wî got ku divê Kurdî bi awayekî fermî bê naskirin û di destûrê de wekî zimanekî fermî cih bigire.

Xwepêşandan bi dirûşma “Bê ziman jiyan nabe” bi dawî bû.

BERTEKA ÎNÎSİYATÎFA GEL A GIRKÊ LEGÊ LI DIJÎ ÊRÎŞÊN HESEKÊ

Gef û êrîşên li dijî xwendekarên ku li Hesekê daxwaza mafê perwerdehiya bi Kurdî kiribûn, bi daxuyaniyeke çapemeniyê ya Înîsiyatîfa Gel a Girkê Legê hatin protestokirin. Daxuyanî li ber avahiya Meclîsa Şaredariyê ji aliyê hevserokê ofîsa navçeyê ya Partiya Yekîtiya Demokratîk (PYD), Îdrîs Mela Şerîf ve hat xwendin.

Di daxuyaniyê de gef û êrîşên li dijî daxwazên rewa yên xwendekaran ji bo perwerdehiya bi zimanê dayikê hatin şermezarkirin. Hate gotin ku ev kiryar binpêkirina mafan in û armanca wan tirsandina xwendekaran û dûrxistina wan ji daxwazkirina mafên xwe ye.

Di daxuyaniyê de bang li hikûmeta demkî, walîyê Hesekê û berpirsiyarên ewlehiyê hat kirin ku erkên xwe pêk bînin. Her wiha hate xwestin ku êrîş bên rawestandin, berpirsiyar bên darizandin û mafê xwendekaran ê perwerdehiya bi zimanê dayikê were parastin.