DYEWLETÊN YEKÎTÎ NAVENDA PIŞTGIRIYA DÎPLOMATÎK A LI BALAFIRGEHA BEXDAYÊ RADÊSTE IRAQÊ

Dewletên Yekîtiya Amerîka (DYA) amade dibe ku navenda piştgiriya dîplomatîk û lojîstîk a li Balafirgeha Bexdayê ji hikûmeta Iraqê re radest bike. Biryarên radestkirinê çend roj beriya bidawîbûna mîsyona koalîsyona navneteweyî ya li pêşengiya DYA li dijî DAÎŞê li Iraqê hat dayîn.

Wezareta Derve ya Iraqê ragihand ku li ser radestkirina navenda girêdayî Balyozxaneya DYA ya li Bexdayê ji aliyê makamên Iraqê ve lihevkirinek hat îmzekirin. Lihevkirin di navbera Steven Fagin, karûbarê balyozê ya DYA li Bexdayê, û berpirsên Iraqê de hat îmzekirin.

Berpirsên ewlekariya Iraqê û çavkaniyên dîplomatîk gotin ku leşkerên DYA berê ji navendê derketine. Radestkirin di demekê de pêk tê ku tê plan kirin koalîsyona navneteweyî ya li pêşengiya DYA li dijî DAÎŞê di 30ê Îlonê de mîsyona xwe li Iraqê bi dawî bîne.

Bexday û Washington di sala 2024an de li ser bidawîkirina mîsyona koalîsyonê li Iraqê li hev kiribûn. Pêvajoya vekişîna koalîsyonê ji Iraqê jî di sala 2025an de dest pê kiribû.

TESÎSATÊN DYA GELEK CARAN BÛNE HEDEFA ÊRÎŞAN

Piştî têkçûna DAÎŞê, hebûna leşkerî ya DYA li Iraqê, bi taybetî di navbera komên çekdar ên girêdayî Îranê û hikûmeta Bexdayê de, bûye yek ji mijarên sereke yên tengezariyê.

Piştî destpêka şerê ku di dawiya Sibatê de li herêmê dest pê kir, tesîsatên DYA li Iraqê jî ketin ber êrîşan. Li gorî Wezareta Derve ya Iraqê, ji bo tesîsatên DYA, di nav de navenda li balafirgeha paytextê, zêdetirî 600 êrîşên bi rokêt û balafirên bêmirov hatine kirin. Hat gotin ku piraniya van êrîşan hatine astengkirin.

Hêmanên dawî yên koalîsyona li pêşengiya DYA li Iraqê hîn li Balafirgeha Hewlêrê ne. Tê plan kirin ku ev hêman jî heta dawiya mehê ji Iraqê derkevin.