SEROKÊ WEZÎRANÊ IRAQÊ: JI BO DERKETINA HÊZÊN TIRKIYÊ EM BI ENQEREYÊ RE DICIVIN

Serokwezîrê Iraqê Ali Zeydi ragihand ku pêvajoya bêçekdarkirina komên çekdar ên derveyî dewletê tê plan kirin ku heta Hezîrana 2027an were temamkirin. Wî herwiha got ku ji bo derketina hêzên artêşa Tirkiyê ji axa Iraq û Herêma Kurdistanê re bi Enqereyê re danûstandin berdewam in.

Zeydi di axaftina xwe ya bi New York Times re da zanîn ku kontrolkirina çekên di destê komên çekdar ên li Iraqê de ji aliyê hikûmetê ve wekî pêdiviyeke mecbûrî tê dîtin. Wî got ku ji bo avakirina aboriyek bihêz û avahiyeke dewleta aram, divê çek tenê di bin kontrola dezgehên dewletê de bin.

Li gorî plana ku Zeydi ragihandiye, di qonaxa yekem de ji bo rawestandina êrîşên komên çekdar û rawestandina êrîşên bersivdayînê yên hêzên Amerîkayê li dijî wan, demek 90 rojan dê were destnîşankirin. Piştre dê qonaxa teslîmkirina çekan dest pê bike û armanc ew e ku pêvajo heta 30ê Hezîrana 2027an were temamkirin. Tê gotin ku hin komên çekdar dixwazin ev dem heta dawiya sala 2027an were dirêjkirin.

Serokwezîrê Iraqê got ku piştî dawiya dema diyarkirî, her kom û kesê ku di bin navê komên çekdar de çalakiyê bidomîne dê wekî yasadêr û qedexekirî were hesibandin. Wî herwiha got ku endamên van koman dê bi awayekî kesane tevlî Hêzên Şaabîyê bibin. Zeydi berê jî ragihandibû ku hebûna çekan li derveyî dezgehên dewletê nayê qebûlkirin.

JI BO DERKETINA HÊZÊN TIRKIYÊ DAXUYANIYA ENQEREYÊ

Zeydi li ser hebûna hêzên Tirkiyê li ser axa Iraq û Herêma Kurdistanê jî got ku danûstandinên wan bi Enqereyê re berdewam in.

Wî got: “Ji bo li ser derketina hêzên Tirkiyê ji axa Iraqê re lihevkirinek pêk bînin, em bi hikûmeta Enqereyê re danûstandinên xwe didomînin.”

Daxuyaniya Zeydi di demekê de hat ku hikûmeta Iraqê dixwaze desthilatdariya dewletê li ser axa xwe xurt bike û çekên komên çekdar ên derveyî dewletê bixe bin kontrolê. Hikûmeta Iraqê berê jî armanca xwe ya dawîkirina hebûna hêzên leşkerî yên biyanî û komên çekdar ên derveyî dewletê li welatê xwe ragihandibû.

LI SER ABORIYA IRAQÊ

Zeydi di heman axaftinê de li ser bandora şerê di navbera Îran û Amerîkayê de li ser aboriya Iraqê jî rawestiya. Wî got ku ji ber rewşa Tengava Hurmuzê, Iraq di dahatên xwe yên ji hinardekirina neftê de windahiyên mezin dike.

Zeydi ragihand ku windahiyên aborî nêzî 60 milyar dolar in û got ku ev rewş li ser dahatên neftê û aboriya Iraqê bandoreke girîng dike.